രക്ഷിതാക്കളുടെ സാന്നിധ്യത്തില്‍ ജീവിക്കേണ്ടി വന്നിട്ടും അനാഥത്വത്തിന്റെ തീവ്ര വേദനയില്‍ ആഴ്ന്നുപോയ നാനി എന്ന പത്തുവയസ്സുകാരിയുടെ കഥ പറയുന്ന ചിത്രമാണ് മിത്ത്. നവാഗതനായ എം. എസ്. സുനില്‍കുമാറാണ് ഈ ചിത്രത്തിന്റെ രചനയും സംവിധാനവും നിര്‍വഹിച്ചത്. വൈറ്റ് മൂണ്‍ മൂവിസിന്റെ ബാനറില്‍ ഷീജാ വിപിന്‍, ശ്രീജിത്ത് പെരുങ്കടവിള  എന്നിവര്‍ ചേര്‍ന്നാണ് ചിത്രം നിര്‍മിച്ചത്.

പ്രസാദാത്മകമായ പ്രകൃതിയെ നാനി അനുഭവിച്ചറിയുകയും അവിടെ നിന്ന് ജീവിതത്തിന്റെ അടിസ്ഥാന പാഠങ്ങളെ മനസ്സിലാക്കുകയും ചെയ്യുന്നു. ഈ ഉള്ളുണര്‍വിലൂടെ അവള്‍ അനാഥയല്ലെന്ന ബോധത്തിലേക്ക് എത്തിച്ചേരുന്നു. ഏകാന്തതയുടേയും ഒറ്റപ്പെടലിന്റേയും ലോകത്ത് നിരാശഭരിതരായി ജീവിക്കുന്ന കുഞ്ഞുമനസ്സുകള്‍ക്ക് ഒരു പാഠവും പ്രാര്‍ത്ഥനയുമായി നാന്‍സി മാറുന്നു. കേരളത്തിന്റെ ക്ഷേത്ര കലാരൂപമായ ചാക്യാര്‍കൂത്തിനെ പശ്ചാത്തലമാക്കിയാണ് ഈ സിനിമയുടെ അവതരണം.

സമകാലീക സാമൂഹ്യവ്യവസ്ഥിതിയില്‍ കുട്ടികളുടെ മേല്‍ അടിച്ചേല്‍പ്പിക്കപ്പെടുന്ന അതിക്രൂരമായ പീഢനങ്ങള്‍ക്ക് ബലിയാടാകേണ്ടി വരുന്ന ബാല്യങ്ങള്‍. സാമൂഹ്യതിന്മകള്‍ക്ക് നിഷ്‌കളങ്കരായ കുട്ടികള്‍ ഇരകളായി , വരുംതലമുറയുടെ പ്രതീക്ഷകള്‍ക്ക് നാശം വിതയ്ക്കുന്നു. എന്നാല്‍ അറിവിന്റെ വെളിച്ചവും നന്മയുടെ ലോകവും പകൃതി സ്‌നേഹവും കുട്ടികളില്‍ പകരാന്‍  സമൂഹത്തിന് കഴിഞ്ഞാല്‍ നന്മയുടെ പുതുലോകം സൃഷ്ടിക്കാനാവുമെന്ന് ഈ ചിത്രം പറയുന്നു. 

പ്രധാനമന്ത്രി മുദ്രായോജന പദ്ധതി പ്രയോജനപ്പെടുത്തി നിര്‍മാണം പൂര്‍ത്തീകരിച്ച ആദ്യ മലയാള ചിത്രമെന്ന പ്രത്യേകതയും ഈ സിനിമയ്ക്കുണ്ട്. ചുരുങ്ങിയ ദിവസം കൊണ്ട് കുറഞ്ഞ നിര്‍മാണ ചെലവില്‍ പൂര്‍ത്തിയാക്കിയ ചിത്രമാണിതെന്ന് അണിയറക്കാര്‍ പറയുന്നു. ചിത്രത്തില്‍ മൂന്ന് ഗാനങ്ങളുണ്ട്. ക്ഷേത്രകലകളില്‍ ഒന്നായ ചാക്യാര്‍കൂത്തിലൂടെ കഥാസഞ്ചാരം നടത്തുന്ന ചിത്രമാണിത്.  

ഛായാഗ്രഹണം : ജഗദീഷ് വി വിശ്വം. ഗാനരചന:  ചുനക്കര രാമന്‍കുട്ടി, എളവൂര്‍ അനില്‍. സംഗീതം:  അരുണ്‍രാജ്, ജി കെ ഹരീഷ്മണി.ഗായകര്‍ :  മധു ബാലകൃഷ്ണന്‍, കെ ഉണ്ണികൃഷ്ണന്‍, അരുണ്‍രാജ്.പശ്ചാത്തല സംഗീതം: അരുണ്‍രാജ്. നൃത്തം : ഡോ. ഗായത്രി സുബ്രമണ്യന്‍. ചമയം : ലാല്‍ കരമന. കലാസംവിധാനം:  ബൈജു വിതുര. വസ്ത്രാലങ്കാരം : ശ്രീജിത് കുമാരപുരം. അസോസ്സിയേറ്റ്  ഡയറക്ടര്‍ : സുബാഷ് പുളിമൂട്ടില്‍. പ്രൊഡക്ഷന്‍ കണ്‍ട്രോളര്‍ :  ഹരി വെഞ്ഞാറമൂട് . പി. ആര്‍. ഒ. : റഹിം പനവൂര്‍.  പ്രൊഡക്ഷന്‍ എക്‌സിക്യൂട്ടീവ് : അരുണ്‍ വി .റ്റി. ഡിസൈനര്‍ : രമേഷ് എം. ചാനല്‍. 

ചിത്രീകരണം പൂര്‍ത്തിയായ സിനിമ ഉടന്‍ തിയേറ്ററുകളിലെത്തും.