തിരുവനന്തപുരംദേശീയ സിദ്ധ ദിനാചരണത്തിന് ഇന്നു തുടക്കമാകും (09-01-2023). ദിനാചരണത്തിന്റെ സംസ്ഥാനതല ഉദ്ഘാടനം ഇന്നു വൈകിട്ട് മൂന്നു മണിക്ക് ആരോഗ്യമന്ത്രി വീണ ജോര്‍ജ്ജ് നിര്‍വഹിക്കും. കവടിയാര്‍ വിമന്‍സ് ക്ലബ്ബില്‍ നടക്കുന്ന ഉദ്ഘാടനച്ചടങ്ങില്‍ വി.കെ. പ്രശാന്ത് എംഎല്‍എ അധ്യക്ഷനാകും. ഭാരതീയ ചികിത്സ വകുപ്പ് ഡയറക്ടര്‍ കെ.എസ് പ്രിയ സ്വാഗതമാശംസിക്കും. പത്മശ്രീ ലക്ഷ്മിക്കുട്ടിയമ്മയെ ചടങ്ങില്‍ ആദരിക്കും. ആയുഷ് വകുപ്പ് പ്രിന്‍സിപ്പല്‍ സെക്രട്ടറി ടിങ്കു ബിസ്വാള്‍ മുഖ്യ പ്രഭാഷണം നടത്തും. സ്വാമി ഗുരുരത്‌നം ജ്ഞാന തപസ്വി, ഡോ എ. കനകരാജന്‍, ശോഭന ജോര്‍ജ്, ഡോ ഹരികൃഷ്ണന്‍ തിരുമംഗലത്ത്, ഡോ എം.എന്‍. വിജയാംബിക തുടങ്ങിയവര്‍ പങ്കെടുക്കും. ദിനാചരണത്തിന്റെ ഭാഗമായി അഞ്ചുദിവസം നീളുന്ന പ്രദര്‍ശന വിപണനമേള, വര്‍ക്ഷോപ്പുകള്‍, സെമിനാറുകള്‍, ആരോഗ്യകരമായ ഭക്ഷണ രീതികള്‍ പരിചയപ്പെടുത്തുന്ന ഭക്ഷ്യമേള എന്നിവയെല്ലാം സംഘടിപ്പിക്കുന്നുണ്ട്. എല്ലാ ദിവസവും വെകുന്നേരം മൂന്ന് മുതല്‍ എട്ട് മണിവരെ വൈവിധ്യമാര്‍ന്ന തനത് വിഭവങ്ങളുള്‍പ്പെടുത്തി ഭക്ഷ്യമേള നടക്കും. ആരോഗ്യകരമായ ജീവിതത്തിന് സിദ്ധ ഭക്ഷണ രീതികളും പോഷകാഹാരവും എന്ന വിഷയത്തില്‍ രാവിലെ 10ന് നടക്കുന്ന സെമിനാറോടെയാണ് ദിനാചരണ പരിപാടികള്‍ ആരംഭിക്കുന്നത്. ഉദ്ഘാടനത്തിനു ശേഷം വൈകിട്ട് അഞ്ചു മുതല്‍ ഏഴ് വരെ ആഹാരമാണ് ഔഷധം എന്ന വിഷയത്തില്‍ പാനല്‍ ചര്‍ച്ചയും തുടര്‍ന്ന് നേമം അഗസ്ത്യം കളരി അവതരിപ്പിക്കുന്ന കളരിപ്പയറ്റ് ഷോയും നടക്കും. രണ്ടാം ദിവസമായ നാളെ (10-01-2023) ഉച്ചയ്ക്ക് മൂന്നു മണിക്ക് 'സ്ത്രീ രോഗങ്ങള്‍ - ഭക്ഷണം ' എന്ന വിഷയത്തില്‍ സെമിനാര്‍ സംഘടിപ്പിക്കും വൈകിട്ട് അഞ്ചു മുതല്‍ ഏഴുവരെ നാഡീ രോഗ നിര്‍ണയം, പ്രായോഗിക വശങ്ങള്‍ എന്ന വിഷയത്തില്‍ പാനല്‍ ചര്‍ച്ച നടക്കും. ദിനാചരണത്തിന്റെ ഭാഗമായി ഇന്നു മുതല്‍ 13 വരെ രാവിലെ ആറു മുതല്‍ 7.30 വരെ പൊതു ജനങ്ങള്‍ക്കായി ഓപ്പണ്‍ യോഗ പരിശീലനവും സംഘടിപ്പിച്ചിട്ടുണ്ട്. കവടിയാര്‍ പാര്‍ക്കിന് സമീപവും തിരുവനന്തപുരം മ്യൂസിയം ക്യാമ്പസിലുമാവും യോഗ പരിശീലനം നടക്കുക. ആഘോഷ പരിപാടികളുടെ സമാപന സമ്മേളനം ജനുവരി 13ന് വൈകിട്ട് മൂന്നു മണിക്ക് ഗതാഗത വകുപ്പ് മന്ത്രി ആന്റണി രാജു ഉദ്ഘാടനം ചെയ്യും.