തിരുവനന്തപുരം: പൊഴിയൂര്‍ കടലില്‍ ശനിയാഴ്ച വൈകീട്ട് കാണാതായ അഞ്ചുപേരുടെയും മൃതദേഹങ്ങള്‍ കണ്ടെത്തി. തിരുനല്‍വേലി സ്വദേശികളായ സബൂറ (14), സുഹൈന്‍ (14), മര്‍ച്ചുക്ക (14), ഫാത്തിമ (12) സബൂറയുടെ അമ്മ തെയ്യൂബ (33) എന്നിവരുടെ മൃതദേഹങ്ങളാണ് ഞായറാഴ്ച രാവിലെ കണ്ടെത്തിയത്. തെക്കന്‍ കൊല്ലങ്കോട് പ്രദേശത്തെ കടലില്‍ രണ്ട് കുട്ടികളുടെ മൃതദേഹങ്ങള്‍ മത്സ്യബന്ധന തൊഴിലാളികളാണ് ആദ്യം കണ്ടെത്തിയത്. രക്ഷാപ്രവര്‍ത്തകര്‍ മൂന്ന് മൃതദേഹങ്ങള്‍കൂടി പിന്നീട് കണ്ടെത്തി.തിരുനെല്‍വേലിയില്‍ നിന്നുള്ള വിനോദ സഞ്ചാരികളുടെ സംഘത്തില്‍പെട്ട അമ്മയും മകളും ഉള്‍പ്പെടെ ഒരു കുടുംബത്തിലെ അഞ്ചുപേരാണ് ശനിയാഴ്ച വൈകീട്ട് അപകടത്തില്‍പ്പെട്ടത്.

20 അംഗസംഘം രണ്ട് വാഹനങ്ങളിലായി ശനിയാഴ്ച വൈകീട്ടോടെയാണ് പൂവാറിലെത്തിയത്. ആറ്റുപുറം കടവില്‍നിന്ന് രണ്ട് ബോട്ടിലായി പൊഴിക്കരയിലെത്തി. അപ്പോള്‍ പൊഴി മുറിഞ്ഞ് കിടക്കുകയായിരുന്നു. ആറരയോടെ ബോട്ടില്‍ നിന്നും ഇറങ്ങിയ സംഘത്തിലെ നാലുകുട്ടികള്‍ കാല്‍ കഴുകുന്നതിനായി കടലിലേക്ക് ഇറങ്ങി. ഇവരാണ് ആദ്യം തിരയില്‍ പെട്ടത്. ഇവരെ രക്ഷിക്കാനുള്ള ശ്രമത്തിനിടെയാണ് തെയ്യൂബയും ഒഴുക്കില്‍പെട്ടത്.