കോട്ടയം: സി.പി. നായര്‍ വധശ്രമക്കേസ് പിന്‍വലിക്കാനുള്ള തീരുമാനം ആഭ്യന്തര വകുപ്പിന്റേതാണെന്നു മുഖ്യമന്ത്രി ഉമ്മന്‍ ചാണ്ടി. ഇതു സംബന്ധിച്ചു തീരുമാനം എടുക്കേണ്ടതു കോടതിയാണ്. സര്‍ക്കാര്‍ ഇത്തരം കാര്യങ്ങളില്‍ ഇടപെടാറില്ലെന്നും അദ്ദേഹം വ്യക്തമാക്കി.

കേസില്‍ സിപിഎമ്മിന്റെയും കോണ്‍ഗ്രസിന്റെയും പ്രവര്‍ത്തകര്‍ ഉള്‍പ്പെട്ടിരുന്നു. ഇതില്‍ നിരവധിപേര്‍ മരിച്ചു. പലരും അവശനിലയിലാണ് ഈ സാഹര്യത്തിലാണ് കേസ് പിന്‍വലിക്കാന്‍ തീരുമാനിച്ചതെന്ന് മുഖ്യമന്ത്രി പറഞ്ഞു.

മുന്‍ ചീഫ് സെക്രട്ടറിയും തിരുവിതാംകൂര്‍ ദേവസ്വം കമ്മിഷണറുമായിരുന്ന സി.പി. നായരെ മലയാലപ്പുഴ ക്ഷേത്രത്തില്‍ വധിക്കാന്‍ ശ്രമിച്ചെന്ന കേസാണ് വിചാരണയ്ക്കിടെ സര്‍ക്കാര്‍ പിന്‍വലിച്ചത്. 2002 മാര്‍ച്ച് 14നായിരുന്നു സംഭവം.

കേസില്‍ പ്രതികളായ കോണ്‍ഗ്രസിന്റെ പത്തനംതിട്ടയിലെ പ്രാദേശിക നേതാക്കളുടെ അപേക്ഷയിലാണു പിന്‍വലിക്കല്‍.