തിരുവനന്തപുരം:സിനിമയെ ഇഷ്ടപ്പെടുന്ന ഒരു യുവ കഥാകൃത്ത് മലയാള സാഹിത്യച്ചരിത്രത്തിലാദ്യമായി  സിനിമയേയും സൂപ്പർതാരങ്ങളേയും കഥാപാത്രങ്ങളാക്കി 15 കഥകളുടെ സമാഹാരം പുറത്തിറക്കിയിരിക്കുന്നു. സിനിമയും താരാധിപത്യവും നിത്യജീവിതസംഭവങ്ങളും  കോർത്തിണക്കിയ രസകരമായ കഥകളുടെ സമാഹാരം   'താരങ്ങൾ വെടിയേറ്റു വീണ രാത്രി'  ഇക്കഴിഞ്ഞ കേരള രാജ്യാന്തര ചലച്ചിത്രമേളയുടെ പ്രധാനവേദിയായ ടഗോർതീയറ്ററിൽ സംവിധായകൻ രാജീവ്‌ നാഥ്  ഛായാഗ്രാഹകാൻ സണ്ണി ജോസഫിന് നൽകി പ്രകാശനം ചെയ്തു.  മലയാള സിനിമയിലെ താരാധിപത്യത്തെ അംഗീകരിക്കാത്ത സണ്ണി ജോസഫിന് തന്നെ ആ പുസ്തകം കൈമാറ്റം ചെയ്യപ്പെട്ടുവെന്നത് ശ്രേദ്ധേയമാണ്.

രാജിവ് നാഥ്,ഷാഹുൽ ഹമീദ് കെ ടി,സണ്ണി ജോസഫ്‌ എന്നിവര് പുസ്തക പ്രകാശന ചടങ്ങിൽ
ഇത്രയും പറഞ്ഞെങ്കിലും ഇതുവരെ കഥാകൃത്തിനെ പരിചയപ്പെടുത്തിയില്ല.  തുരുത്ത്,ദി റോഡ്‌ എന്നീ ഹ്രസ്വ ചിത്രങ്ങൾക്ക് തിരക്കഥയെഴുതുകയും,അഞ്ചോളം കഥാസമാഹാരങ്ങൾ പ്രസിദ്ധികരിക്കുകയും,കേരളത്തിന്റെ വിവിധ ഭാഗങ്ങളിലായി ചിത്ര പ്രദർശനങ്ങൾ നടത്തുകയും ചെയ്ത ഷാഹുൽ ഹമീദ് കെ ടി യാണ് താരങ്ങൾ വെടിയേറ്റു വീണ രാത്രിയുടെ സൃഷ്ടാവ്.  മലയാളം വാരിക ഉൾപ്പെടെയുള്ള  പ്രസിദ്ധികരണങ്ങളിൽ ഷാഹുലിന്റെ കഥകൾ അച്ചടിച്ച്‌ വന്നിട്ടുണ്ട്. 

പെരിന്തൽമണ്ണസ്വദേശിയായ ഷാഹുൽ അവിടെ  ആരോഗ്യ വകുപ്പിൽ നഴ്സാണ്. ഭാര്യയും രണ്ടു കുട്ടികളുമടങ്ങുന്ന കുടുംബത്തോടൊപ്പം പെരിന്തൽമണ്ണയിൽ താമസിക്കുന്ന ന്യുജെൻ എഴുത്തുകാരന്റെ മറ്റൊരു പുതിയ രചനയായ സ്പ്രിംഗ് സമ്മർ ഫാൾ വിന്റർ ആൻഡ്‌ സ്പ്രിംഗ് ഉടൻ വിപണിയിലെത്തും.