തിരുവനന്തപുരം: പി ഭാസ്‌കരന്റെ 12-ാം ചരമ വാര്‍ഷിക ദിനാചരണം  ഭാസ്‌കരന്‍ മാസ്റ്റര്‍ സാംസ്‌കാരിക വേദി ആചരിച്ചു. വെള്ളയമ്പലം മാനവീയം വീഥിയില്‍ പി.ഭാസ്‌കരന്റെ പ്രതിമയില്‍ പുഷ്പാര്‍ച്ചന നടത്തി കെ.മുരളീധരന്‍ എം.എല്‍.എ അനുസ്മരണ ചടങ്ങ്  ഉദ്ഘാടനം ചെയ്തു. മലയാള സിനിമയെ മലയാളീകരിച്ച സകലകലാവല്ലഭനാണ് പി.ഭാസ്‌കരനെന്ന് അദ്ദേഹം പറഞ്ഞു. മലയാളിക്ക് ഒരിക്കലും മറക്കാനാവാത്ത നിരവധി ഗാനങ്ങള്‍ സംഭാവന ചെയ്ത ഭാസ്‌കരന്‍ മാസ്റ്റര്‍ നല്ല നടനും മികച്ച സംവിധായകനുമായിരുന്നുവെന്നും എം.എല്‍.എ അനുസ്മരിച്ചു. ഭാസ്‌കരന്‍ മാസ്റ്റര്‍ സാംസ്‌കാരിക വേദി പ്രസിഡന്റ് ഡോ. എം.ആര്‍ തമ്പാന്‍, ചലച്ചിത്ര അക്കാദമി സെക്രട്ടറി മഹേഷ് പഞ്ചു, ചലച്ചിത്ര സംവിധായകന്‍ ബാലു കിരിയത്ത്, മണക്കാട് രാമചന്ദ്രന്‍, സുകു പാല്‍ക്കുളങ്ങര, ഗോപന്‍ ശാസ്തമംഗലം, ജയശ്രീ ഗോപാലകൃഷ്ണന്‍, ഷീല എബ്രഹാം, സാംസ്‌കാരിക വേദി സെക്രട്ടറി ടി. നാരായണന്‍, ജി. ശിവകുമാര്‍, അജിത്‌രാജ്, രാജ്കുമാര്‍, ബാബുകൃഷ്ണ, ജയകുമാര്‍ തുടങ്ങിയവരും  പ്രതിമയില്‍ പുഷ്പാര്‍ച്ചന നടത്തി സംസാരിച്ചു.