ജോഷി സാമുവല്‍
മലയാള സിനിമയില്‍ സജീവമാകാന്‍ ആഗ്രഹിക്കുന്ന യുവ താരമാണ് ജോഷി സാമുവല്‍. പത്തനംതിട്ട റാന്നി സ്വദേശിയായ ജോഷി കലാ കുടുംബത്തിലെ അംഗമാണ്. ഇപ്പോള്‍ ചെന്നൈയിലാണ് സ്ഥിര താമസം. സ്‌കൂളിലും കോളേജിലും പഠിക്കുമ്പോള്‍ ആര്‍ട്‌സിലും സ്‌പോര്‍ട്‌സിലും ഒന്നാം സ്ഥാനക്കാരനായിരുന്നു. മോണോ ആക്ടിലും ഡാന്‍സിലും ലളിതഗാനത്തിലും ഫാന്‍സി ഡ്രസ്സിലും നിരവധി സമ്മാനങ്ങള്‍ വാങ്ങിയിട്ടുണ്ട്. സിനിമയോടുള്ള ഇഷ്ടം കൊണ്ട് ചെന്നൈ അഡയാര്‍ ഫിലിം ഇന്‍സ്റ്റിറ്റ്യൂട്ടില്‍ നിന്ന് ആക്ടിംഗ് കോഴ്‌സ് പഠിച്ച് ഡിപ്ലോമ നേടി. മോഡല്‍ കൂടിയായ ഈ യുവാവ് പ്രശസ്ത സ്ഥാപനങ്ങളുടെ നിരവധി പരസ്യ ചിത്രങ്ങളില്‍ അഭിനയിച്ചിട്ടുണ്ട്.
   
തമിഴ് ടിവി ചാനലായ വിന്‍ ടിവി സംപ്രേഷണം ചെയ്ത ലാഡ് ലബക്ക് ദാസ് എന്ന സീരിയലിലാണ് ആദ്യം അഭിനയിച്ചത്. അശോക്‌രാജ് സംവിധാനം ചെയ്ത ഈ സീരിയലില്‍ പ്രധാന കഥാപാത്രത്തെയാണ് ജോഷി അവതരിപ്പിച്ചത്. സീരിയലിന്റെ രണ്ട് കഥകളില്‍ ജോഷി നായകനായിരുന്നു. തമിഴില്‍ വഞ്ചിനാഥ് എന്ന ചിത്രത്തിലായിരുന്നു ആദ്യം അഭിനയിച്ചത്. ഇന്ദ്രജിത്തും ജഗതി ശ്രീകുമാറും പ്രധാന കഥാപാത്രങ്ങളെ അവതരിപ്പിച്ച ചേരിയാണ് ജോഷി അഭിനിയച്ച ആദ്യ മലയാള ചിത്രം. മമ്മൂട്ടി നായകനായ ദുബായ് എന്ന സിനിമയിലും അഭിനയിച്ചിട്ടുണ്ട്.
   
വേലു മുരുകദാസ് സംവിധാനം ചെയ്യുന്ന നോ എന്ന തമിഴ് ചിത്രത്തില്‍ ജോഷി പോലീസ് ഓഫീസറായി അഭിനയിക്കുന്നു. ഹൊറര്‍ ചിത്രമായ ഇതില്‍ പ്രധാന കഥാപാത്രത്തെയാണ് അവതരിപ്പിക്കുന്നത്. കോളേജ് വിദ്യാര്‍ത്ഥികള്‍ വനത്തില്‍ ടൂറിന് പോകുമ്പോള്‍ പെണ്‍കുട്ടികള്‍ മാത്രം കൊല്ലപ്പെടുന്നു. കോളേജ് കുട്ടികളെ രക്ഷപ്പെടുത്തുന്ന കഥാപാത്രത്തെയാണ് ജോഷി ഇതില്‍ അവതരിപ്പിക്കുന്നത്. സിനിമയില്‍ ജോഷിയുടെ ആദ്യത്തെ പോലീസ് വേഷമാണിത്.