ശ്രീനഗര്‍: ശ്രീനഗര്‍ എന്‍ഐടി കാമ്പസ് സന്ദര്‍ശിനെത്തിയ ബോളിവുഡ് താരം അനുപം ഖേറിനെ ശ്രീനഗര്‍ വിമാനത്താവളത്തില്‍ പോലീസ് തടഞ്ഞു. എന്‍ഐടി വിദ്യാര്‍ഥികള്‍ക്കുനേര്‍ക്ക് പോലീസ് നടത്തിയ ലാത്തിച്ചാര്‍ജില്‍ പ്രതിഷേധം രേഖപ്പെടുത്തുന്നതിനാണ് ഖേര് എത്തിയത്. കാമ്പസില്‍ സന്ദര്‍ശനം നടത്തുമെന്ന് അനുപം ഖേര്‍ നേരത്തെ അറിയിച്ചിരുന്നു. എന്നാല്‍ കാമ്പസില്‍ ആളുകള്‍ സംഘം ചേരുന്നത് തടയണമെന്ന് നിര്‍ദേശമുണ്ടെന്നു ചൂണ്ടിക്കാട്ടിയാണ്  അനുപം ഖേറിനെ വിമാനത്താവളത്തില്‍ തടഞ്ഞത്.

ട്വന്റി 20 ലോകകപ്പ് സെമിഫൈനലില്‍ വെസ്റ്റിന്‍ഡീസ് ഇന്ത്യയെ തോല്‍പ്പിച്ചത് ഒരുകൂട്ടം കാഷ്മീരി വിദ്യാര്‍ഥികള്‍ ആഘോഷിച്ചതിനെ തുടര്‍ന്നാണ് കാമ്പസില്‍ സംഘര്‍ഷം ആരംഭിച്ചത്. തുടര്‍ന്നുണ്ടായ സംഘര്‍ഷം നിയന്ത്രണാതീതമായതോടെ സര്‍ക്കാര്‍ ക്രമസമാധാന ചുമതല സിആര്‍പിഎഫിനെ ഏല്‍പ്പിക്കുകയായിരുന്നു.