മരുഭൂമിയിലെ ആനയ്ക്ക് ശേഷം വി.കെ. പ്രകാശ് സംവിധാനം ചെയ്യുന്ന കെയര്‍ഫുള്‍ എന്ന ചിത്രത്തിലൂടെ ജോമോള്‍ (ഗൗരി) വീണ്ടും വരുന്നു. ഒമ്പത് വര്‍ഷത്തെ ഇടവേളയ്ക്ക് ശേഷമാണ് ജോമോള്‍ സിനിമയിലേക്ക് മടങ്ങിയെത്തുന്നത്. 2007ല്‍ റിലീസ് ചെയ്ത രാക്കിളിപ്പാട്ടിലാണ് ജോമോള്‍ ഏറ്റവുമൊടുവില്‍ അഭിനയിച്ചത് . ചന്ദ്രശേഖരന്‍ പിള്ളയെ വിവാഹം ചെയ്ത ജോമോള്‍ ഹിന്ദു മതം സ്വീകരിയ്ക്കുകയും ഗൗരി എന്ന് പേര്  മാറ്റിയതിനുശേഷം അഭിനയിച്ച സിനിമയായിരുന്നു അത്. 

ഒരു വടക്കന്‍ വീരഗാഥ എന്ന ചിത്രത്തില്‍ ഉണ്ണിയാര്‍ച്ചയുടെ ബാല്യകാലം അഭിനയിച്ചു കൊണ്ടാണ് ജോമോള്‍ സിനിമയില്‍ അരങ്ങേറ്റം കുറിച്ചത്. എന്റെ സ്വന്തം ജാനകി കുട്ടി എന്ന ചിത്രത്തിലെ അഭിനയത്തിന് ദേശീയ പുരസ്‌കാര ജൂറിയുടെ പ്രത്യേക പരാമര്‍ശവും മികച്ച നടിക്കുള്ള കേരള സംസ്ഥാന പുരസ്‌കാരവും ലഭിച്ചിട്ടുണ്ട്. പഞ്ചാബി ഹൗസ്, മയില്‍പ്പീലിക്കാവ്, എന്ന് സ്വന്തം ജാനകിക്കുട്ടി, നിറം, പുത്തൂരം പുത്രി ഉണ്ണിയാര്‍ച്ച തുടങ്ങിയ സിനിമകളില്‍ അഭിനയിച്ചു.

വിജയ് ബാബു നായകനായെത്തുന്ന ചിത്രത്തില്‍ നവാഗതയായ സന്ധ്യ രാജുവാണ് നായിക. അജു വര്‍ഗീസ്, സൈജു കുറുപ്പ്, വിനീത്, ശ്രീജിത്ത് രവി, പാര്‍വതി നമ്പ്യാര്‍ തുടങ്ങിയവര്‍ മറ്റ് കേന്ദ്ര കഥാപാത്രങ്ങളെ അവതരിപ്പിക്കുന്നു. അടുത്തമാസം ചിത്രീകരണം ആരംഭിക്കും.