സ്റ്റീഫന്‍ ദേവസ്സിയ്‌ക്കൊപ്പം ജ്യോതിഷും കുടുംബാംഗങ്ങളും സുഹൃത്തുക്കളും
തിരുവനന്തപുരം : ഭിന്നശേഷിക്കാരനായ പതിനാറു വയസ്സുകാരന്‍ ജ്യോതിഷിന്റെ കണ്ണുകളില്‍ സന്തോഷത്തിളക്കം. സ്റ്റീഫന്‍ ദേവസ്സി  എന്ന യുവപ്രതിഭയായ കീബോര്‍ഡിസ്റ്റിനെ നേരില്‍ കാണാനും പെര്‍ഫോം ചെയ്യാനും   ആഗ്രഹിച്ചിരുന്നത് സഫലമായതിന്റെ സന്തോഷമാണ് ജ്യോതിഷിന്. തിരുവനന്തപുരം കോവളം നിവാസികളായ ജ്യോതിബാസു - ഷീബ ദമ്പതികളുടെ മകനാണ് പ്ലസ് വണ്‍ വിദ്യാര്‍ത്ഥിയായ ജ്യോതിഷ്.ജന്മന ഭിന്നശേഷിക്കാരനാണ്. കുട്ടിക്കാലം മുതല്‍ സംഗീതത്തോട്  താല്പര്യമുള്ള ജ്യോതിഷ് ടിവിയിലും മറ്റും കീബോര്‍ഡ് വായിക്കുന്നത് ശ്രദ്ധിക്കുകയും പഠിക്കുവാന്‍ ആഗ്രഹം പ്രകടിപ്പിക്കുകയും ചെയ്തിരുന്നു. വ്‌ലോഗാറായ കിരണ്‍ ടിറ്റോ, ഖത്തറിലുള്ള ജോര്‍ജെന്‍ ജോസഫ്, ഭിന്നശേഷിയുള്ള കുട്ടികളുടെ ഉന്നമനത്തിനു വേണ്ടി പ്രവര്‍ത്തിക്കുന്ന സ്‌നേഹ സാന്ദ്രം ചാരിറ്റബിള്‍  ട്രസ്റ്റിന്റെ  സെക്രട്ടറി ഷീജ സാന്ദ്ര എന്നിവരുടെ സഹായത്തോടുകൂടി  തിരുവനന്തപുരത്തു വച്ച് സ്റ്റീഫന്‍ ദേവസ്സിയെ കണ്ടു.' സാറിനെ  നേരില്‍ കണ്ടപ്പോള്‍ സന്തോഷംകൊണ്ട് ഹൃദയം ഇടിക്കുന്നതുപോലെ തോന്നി.ജീവിതത്തിലെ വലിയ ആഗ്രഹമാണ് സാധിച്ചത്.കീബോര്‍ഡ് പഠിക്കുന്നതിന് ആവശ്യമായ ചെലവ് സാര്‍ വഹിച്ചോളാമെന്നും പറഞ്ഞു 'ജ്യോതിഷിന്റെ വാക്കുകളില്‍  സന്തോഷവും അഭിമാനവും.