തിരുവനന്തപുരം: ആർ കെ ലക്ഷ്മണന്റെ കാർട്ടൂണുകൾ ധാരാളം കണ്ടിട്ടുള്ള എനിക്ക് ഹക്കു വെന്ന ഹരികുമാറിന്റെ കാർട്ടണുകൾ കാണുമ്പോൾ ലക്ഷ്മണിനെയാണ് ഓര്മവരുന്നത്. അതുകൊണ്ട് എനിക്ക് മലയാളത്തിലെ ആർകെ ലക്ഷ്മൺ ഹക്കുവാണ് എന്ന് മുൻ ചീഫ് സെക്രട്ടറിയും ഭരണ പരിഷ്കാര കമ്മീഷൻ അംഗവുമായ സി പി നായർ പറഞ്ഞു. ഹക്കുവിന്റെ കാർട്ടൂൺ സമാഹാരങ്ങളായ കാർട്ടൂണിലെ പിണറായി, ചിരിവരയിലെ മോദി എന്നിവയുടെ പ്രകാശന ചടങ്ങിൽ കാർട്ടൂണിലെ പിണറായിയുടെ പ്രകാശനം നിർവഹിച്ചു സംസാരിക്കുമ്പോഴാണ് അദ്ദേഹം ഇങ്ങനെ അഭിപ്രായപ്പെട്ടത്. മേയർ വി കെ പ്രശാന്ത് അധ്യക്ഷനായ ചടങ്ങിൽ സി പി നായറിൽ നിന്ന് കാർട്ടൂണിസ്റ്റ് പി വി കൃഷ്ണൻ പുസ്തകം സ്വീകരിച്ചു. ചിരിവരയിലെ മോദി കരയ്ക്കാമണ്ഡപം വിജയകുമാർ കാർട്ടൂൺ അക്കാദമി ചെയർമാൻ സുകുമാറിന് നൽകി പ്രകാശനം ചെയ്തു. ദിലീപ് തിരുവട്ടാർ, ബിന്നി സാഹിതി എന്നിവർ സംസാരിച്ചു.