തിരുവനന്തപുരം: റാങ്ക് ലിസ്റ്റുകളുടെ കാലാവധി  നീട്ടണമെന്ന് സര്‍ക്കാര്‍ ശുപാര്‍ശ പിഎസ്സിയുടെ പ്രത്യേക യോഗം അംഗീകരിച്ചു. ഇതുവരെ കാലാവധി നീട്ടിക്കിട്ടാത്ത റാങ്ക് ലിസ്റ്റുകളാണ് നീട്ടിയത്. സ്വാഭാവിക യായ മൂന്നുവര്‍ഷം ഡിസംബര്‍ 31 ന് കാലാവധി തികയുന്നതും അടുത്തവര്‍ഷം ജൂണ്‍ 30 വരെയുള്ള കാലയളവില്‍ മൂന്നുവര്‍ഷ കാലാവധി പൂര്‍ത്തിയാകുന്നതുമായ റാങ്ക് ലിസ്റ്റുകള്‍ക്ക് ഇതിന്റെ പ്രയോജനം ലഭിക്കും. ചെറുതും വലുതുമായ  90 ജില്ലാ റാങ്ക് ലിസ്റ്റുകളടക്കം  ഇരുനൂറോളം ലിസ്റ്റുകളുടെ കാലാവധിയാണ് നീട്ടുക.  ഈ കാലളവില്‍ ഏതെങ്കിലും ഒരു തസ്തികയ്ക്ക് പുതിയ റാങ്ക് ലിസ്റ്റ് പ്രാബല്യത്തില്‍ വരികയാണെങ്കില്‍ നിലവിലുള്ള റാങ്ക് ലിസ്റ്റ് റദ്ദാകും.

പോലിസ് തുടങ്ങിയ  യൂണിഫോംഡ് ഫോഴ്‌സസിലെ ട്രെയിനിംഗ് ആവശ്യമായ തസ്തികകള്‍ക്കുള്ള റാങ്ക് ലിസ്റ്റുകള്‍ക്കും പരിശീലനത്തിന്  തെരഞ്ഞെടുക്കുയും തുടര്‍ന്ന് സ്വമേധയാ നിയമിതരാകുകയും ചെയ്യുന്ന സര്‍വ്വീസുകളുടെയും തസ്തികകളുടെയും റാങ്ക് ലിസ്റ്റുകള്‍ക്കും കാലാവധി നീട്ടല്‍ ബാധകമല്ല.

പിഎസ്സി ചട്ടം 13 പ്രകാരം മൂന്നുവര്‍ഷമാണ് റാങ്ക് ലിസ്റ്റുകളുടെ കാലാവധിയെങ്കിലും അഞ്ച് തവണ വരെ കാലാവധി നീട്ടിയ റാങ്ക് ലിസ്റ്റുകള്‍ നിലവിലുണ്ട്.