പാറ്റ്‌ന: മുഖ്യമന്ത്രി നിതീഷ് കുമാര്‍ ബിഹാറില്‍ തെരഞ്ഞെടുപ്പു വാഗ്ദാനമായ  സമ്പൂര്‍ണ മദ്യനിരോധനം ഏര്‍പ്പെടുത്തി. ഇന്ത്യന്‍ നിര്‍മിത മദ്യവും വിദേശ മദ്യവും പൂര്‍ണമായും സംസ്ഥാനത്ത് നിരോധിച്ചു. ബാറുകള്‍ക്കും ഹോട്ടലുകള്‍ക്കും ഇനി മദ്യവില്‍പനയ്ക്ക് ലൈസന്‍സ് നല്‍കില്ലെന്ന് നിതീഷ് കുമാര്‍ പറഞ്ഞു. എന്നാല്‍ സൈനിക കന്റീനുകളില്‍ മദ്യം വിളമ്പുന്നതിന് വിലക്കില്ല. നേരത്തേ കള്ളിനും ചാരായത്തിനും നിരോധനം ഏര്‍പ്പെടുത്തിയിരുന്നു.

ഇതോടെ രാജ്യത്ത് സമ്പൂര്‍ണ മദ്യനിരോധനം ഏര്‍പ്പെടുത്തുന്ന നാലാമത്തെ സംസ്ഥാനമായി ബിഹാര്‍. ഗുജറാത്ത്, മിസോറം, നാഗാലാന്‍ഡ് എന്നീ സംസ്ഥാനങ്ങളിലാണ് നിലവില്‍ സമ്പൂര്‍ണ മദ്യനിരോധനമുള്ളത്.  മദ്യനിരോധനം വാഗ്ദാനം ചെയ്താണു നിതീഷ് തെരഞ്ഞെടുപ്പില്‍ മത്സരിച്ചത്. വാഗ്ദാനം നടപ്പാക്കുമ്പോള്‍ സര്‍ക്കാരിനു വര്‍ഷം 4,000 കോടി രൂപ നഷ്ടമാകും.