ബാല്യകാലസഖിക്കുശേഷം മൂന്നു കഥകള്‍ കേട്ടിരുന്നു. അതിലൊന്നിന്റെ  തിരക്കഥ രചനയിലാണിപ്പോള്‍. ആറു മാസം കഴിഞ്ഞേ ചിത്രീകരണം ആരംഭിക്കു.  വളരെ സമയമെടുത്ത് ആലോചിച്ച് സസൂക്ഷ്മമാണ് പുതിയ ചിത്രത്തെ സമീപിക്കുന്നത്.  ബാല്യകാലസഖി എന്ന വലിയ പ്രൊജക്റ്റ് ചെയ്തു സിനിമയിലേക്ക് കടന്നുവന്ന സംവിധായകന്‍ എന്ന നിലക്ക് ആ സിനിമ നേടിത്തന്ന ഇമേജ് നിലനിര്‍ത്തുക എന്ന കാഴ്ചപ്പാടോടെയായിരിക്കും  പുതിയ സിനിമ ചെയ്യുക .  

ആദ്യ സിനിമയെപ്പോലെ പ്രശസ്ത സാഹിത്യസൃഷ്ടിതന്നെയാണോ പുതിയ സിനിമ?
അല്ല,കഥയുണ്ടാക്കിയാണ് പുതിയ സിനിമ ചെയ്യുന്നത്.  ന്യു ജെനറേഷൻ അഭിമുഖീകരിക്കുന്ന പ്രശ്‌നങ്ങളെ ഹാസ്യരൂപത്തില്‍ അവതരിപ്പിക്കുന്ന പുതിയ കാലഘട്ടത്തിന്റെ സിനിമയാണത്. വളരെ വേഗത്തില്‍ പോകുന്ന ഒരു സിനിമ.  മലയാളത്തിലെ തിരക്കുള്ള രണ്ടു നടന്മാരാണ് ഇതില്‍ പ്രധാന കഥാപാത്രങ്ങളെ അവതരിപ്പിക്കുന്നത്. 
ആദ്യ സിനിമയിലൂടെ മികച്ച  തുടക്കം കിട്ടിയിട്ടും അടുത്ത സിനിമചെയ്യാൻ ഒരുപാട് സമയം എടുക്കുന്നുണ്ടല്ലോ; ഈ ഇടവേള എങ്ങനെയൊക്കെയാണ് വിനിയോഗിക്കുന്നത്?
ഞാനിപ്പോള്‍ റിപ്പോര്‍ട്ടര്‍  ടിവിയില്‍ പ്രോഗ്രാം ചീഫായി ജോലി ചെയ്യുന്നു. അതുപോലെ കൊൽക്കത്ത ശാന്തിനികേതനില്‍  സാഹിത്യം നാടകത്തിലേക്കും സിനിമയിലേക്കും എങ്ങനെ ഉപയോഗിക്കാം, അവ എങ്ങനെ ലിറ്റററി ഇമേജിൽ നിന്ന് വിഷ്വൽ ഫോർമാറ്റിലേക്ക് മാറ്റപ്പെടാം എന്ന വിഷയത്തിൽ പി എച്ച് ഡി ചെയ്തുകൊണ്ടിരിക്കുന്നു .  മാജിക് ഉള്‍പ്പെടുത്തി ഒരു മള്‍ട്ടി മീഡിയ പ്രൊഡക്ഷന്‍ ചെയ്തു. ഒരു ഷോര്ട്ട്ഫിലിം ചെയ്തു.  ഒരു ഡോക്കുമെന്ററി ചെയ്തുകൊണ്ടിരിക്കുന്നു.  വില്യം ഷേക്ക്‌സ്പീയറിന്റെ ഹാംലെറ്റ്  തൃശ്ശൂരിലെ ഒരു സംഘത്തിനു വേണ്ടി ചവിട്ടുനാടകത്തിലേക്ക് അഡോപ്റ്റ് ചെയ്തു അവതരിപ്പിക്കുന്നതിന്റെ റിഹേഴ്സൽ നടന്നു കൊണ്ടിരിക്കുന്നു. ഒരു സിനിമ സംവിധായകനായി മാത്രം നിലകൊള്ളാന്‍ ഞാനഗ്രഹിക്കുന്നില്ല.  ഏതു സിനിമയായാലും അത് പെട്ടെന്ന് ചെയ്യണമെന്ന  നിർബന്ധവും എനിക്കില്ല .  പത്തു സിനിമകള്‍ ചെയ്യുന്നതിന് പകരം എവിടെയെങ്കിലും പ്രതിഷ്‌ഠിക്കപ്പെടുന്ന മൂന്നു ചിത്രങ്ങള്‍ ചെയ്താല്‍ മതിയെന്നാണ് ഞാനാഗ്രഹിക്കുന്നത്.
ദേശീയ അവാര്‍ഡ് പ്രതീക്ഷിച്ച ചിത്രത്തിനു അതു കിട്ടാത്തത്  എന്തുകൊണ്ടാണ്? 
ദേശീയ  അവാര്‍ഡിനു ചിത്രങ്ങൾ  അയക്കേണ്ടി വന്നപ്പോൾ സംഭവിച്ച  പാകപിഴകളാണതിന് കാരണം.    ബാല്യകാലസഖി റിലീസ്  ചെയ്യുന്നതിനു നാലു ദിവസം മുൻപാണ്‌ ദേശീയ അവാർഡിലേക്ക് ക്ഷണിച്ചത്.  രണ്ടു ദിവസം മുൻപ്  ചിത്രം അവിടെ എത്തിക്കണമായിരുന്നു.   അതിനാൽ ഫൈനല്‍  പ്രോസസ്സിങ്ങിലായിരുന്ന ചിത്രം സബ്ടൈറ്റില്‍ ഇല്ലാതെ അപൂർണ്ണമായി  അയക്കേണ്ടിവന്നു. അങ്ങനെ സംഭവിച്ചില്ലായിരുന്നുവെങ്കിൽ  ഒന്നു രണ്ടു മേഖലകളിൽ  അംഗീകരിക്കപ്പെടുമായിരുന്നു.
ബഷീറിന്റെ  ക്ലസ്സിക്കല്‍ കൃതി,മമ്മൂട്ടി,സീമ ബിശ്വാസ് തുടങ്ങിയ അഭിനയ പ്രതിഭകൾ ,രാഘവൻ മാഷിന്റെ  സംഗീതം, സംവിധാന മികവ് എന്നിട്ടും സിനിമ വലിയ സാമ്പത്തിക വിജയമാകാത്തതിനു കാരണം?
വൈക്കം മുഹമ്മദ്‌ബഷീറിന്റെ  ക്ലസ്സിക്കല്‍ കൃതി ഒരു കച്ചവട സിനിമയാക്കാന്‍ ഒരിക്കലും കഴിയില്ല.ആ കൃതിയുടെ നിലവാരത്തില്‍ നിന്നുകൊണ്ട്  കൃതിക്ക്  ഒരു പോറൽപോലും ഏൽക്കാത്ത രീതിയിൽ സംവിധാനം ചെയ്തു നിര്‍മ്മാതാവിനു വലിയ നഷ്ടമുണ്ടാക്കാതെ  വളരെ സേഫായിട്ട് ലോഞ്ച്  ചെയ്ത സിനിമ ആണത്. സിനിമ നിര്‍മിച്ച ലിവിനാർട്ട് ഫിലിം ഫാക്ടറിക്ക്  ആദ്യ ചിത്രത്തിലൂടെ മലയാള സിനിമയില്‍ അവരുടെ സ്ഥാനം  ഉറപ്പിക്കുകയായിരുന്നു ലക്‌ഷ്യം.  അതിനുവേണ്ടി മികച്ച അഭിനേതാക്കളെയും സാങ്കേതിക വിദഗ്ദ്ധരേയും അണിനിരത്തി മികച്ച രീതിയിലാണ് ചിത്രം ഒരുക്കിയത്. ആറേ കാല്‍ കോടി മൊത്തം നിര്മ്മാണ ചെലവായ ചിത്രത്തിന്റെ സാറ്റ്‌ലൈറ്റ്  അവകാശം  നാലേകാല്‍ കോടിക്കാണ് സുര്യ ടിവി സ്വന്തമാക്കിയത്.  ചിത്രത്തിന്റെ മ്യുസിക്റൈറ്റ് മനോരമമ്യുസിക് വാങ്ങുകയും തീയറ്ററിൽ രണ്ടാഴ്ച ഓടുകയും ചെയ്ത ബാല്യകാലസഖി   സാമ്പത്തിക  പരാജയം ആയിരുന്നില്ല. അതുകൊണ്ട് തന്നെ  ലിവിനാർട്ട് പുതിയ സിനിമ ചെയ്യാനുള്ള തയ്യാറെടുപ്പിലുമാണ്.
മമ്മൂട്ടിക്കൊപ്പമുള്ള അനുഭവം
ഞാന്‍ കൈരളി ടിവിയില്‍ പ്രോഗ്രാം പ്രൊഡ്യുസര്‍ ആയിരുന്നപ്പോഴാണ്  ചെയര്മാനായ മമ്മൂട്ടിയെ പരിചയപ്പെടുന്നത്. മമ്മൂട്ടിയെ വളരെയധികം ആരാധിച്ചിരുന്ന എനിക്ക്  അവിടുത്തെ യോഗങ്ങളിൽ  അദ്ദേഹം  പല നിർദ്ദേശങ്ങളും തന്നിരുന്നു.  അതൊക്കെ ഒരു ദൈവാനുഗ്രഹം പോലെ  ഞാന്‍ കൈക്കൊണ്ടു. പിന്നീട് ഞാന്‍ മഴവില്‍ മനോരമയിൽ സീനിയർ പ്രൊഡ്യുസർ ആയി   ജോലിനോക്കുന്ന സമയത്ത് എം ടി യെ കുറിച്ചുള്ള സിഡി പ്രകാശന ചടങ്ങിൽ അദ്ദേഹത്തിന്റെ രണ്ടാമൂഴം ബേസ് ചെയ്ത് അവതരിപ്പിച്ച ഭീമമം  മൾട്ടി  മീഡിയ ഡ്രാമയിൽ  ഭീമനായി അഭിനയിച്ചത് മമ്മൂക്കയാണ്. അതു സംവിധാനം ചെയ്യാനായി എന്റെ പേര് നിർദ്ദേശിച്ചതും അദ്ദേഹമാണ്.  അതിന്റെ ജോലിയുമായി  ബന്ധപ്പെട്ട് 25ദിവസത്തോളം മമ്മൂക്കയുമായി ഇടപഴകാൻ പറ്റി. അതിനെത്തുടര്ന്നാണ്  ബാല്യകാലസഖിയിലേക്കെത്തുന്നത്. തീയറ്ററിന്റെ തട്ടകത്തില്‍ നിന്നു വന്ന എന്നെ മറ്റു മേഖലകളിലേക്ക്  എത്തിക്കണമെന്ന  സ്നേഹവും  പ്രോത്സാഹനവും വാത്സല്യവുമൊക്കെ മമ്മൂക്കയുടെ ഭാഗത്ത് നിന്നുണ്ടായിട്ടുണ്ട്.  തുടര്ന്നും മമ്മൂക്കയുമായി ചേർന്നുള്ള  മറ്റു പ്രൊജെക്ടുകളും എന്റെ ആലോചനയിലുണ്ട്.  അവയ്ക്ക്  മമ്മൂക്കയിൽ നിന്ന്  സഹകരണം ഉണ്ടാകുമെന്ന് പ്രതീക്ഷിക്കുന്നു.

ഭീമമം റിഹേഴ്സൽ:പ്രമോദ് പയ്യന്നൂർ, മമ്മൂട്ടി, ലോഹിതദാസ്                    ഭീമനായി മമ്മൂട്ടി
തീയറ്റര്‍-മിനിസ്‌ക്രീന്‍-സിനിമ പ്രവർത്തകൻ എന്ന  നിലയില്‍ ഒന്ന് മറ്റൊന്നിനേക്കാള്‍ മെച്ചമാണെന്ന് എനിക്കഭിപ്രായമില്ല.  ഒരു വിഷ്വലൈസര്‍ എന്ന നിലയില്‍ ഇവ മൂന്നും എനിക്ക് സംതൃപ്തി നല്കുന്നുണ്ട്.  പക്ഷെ,നാടകത്തിനെ അപേക്ഷിച്ച്  ജനപ്രീതിയും  പ്രതിഫലവും കൂടുതല്‍ ലഭിക്കുന്നത് സിനിമയില്‍ നിന്നും.

സിനിമയില്‍ പേരെടുത്ത പലരും നാടകം പഠിച്ചോ പ്രവര്ത്തിച്ചോ വന്നവരാണ് ഇപ്പോള്‍ താങ്കളും. ഇങ്ങനെ ചെയ്യുന്നതുകൊണ്ടാല്ലേ നാടകം തളരുന്നത?