തിരുവനന്തപുരം: മകന്‍ നഷ്ടപ്പെട്ട അമ്മയുടെ വേദന കണ്ടിട്ടു മനസ്സിളകാത്തവര്‍ക്കാണു കുരിശു കണ്ടപ്പോള്‍ ഹാലിളകിയത്. തിരഞ്ഞെടുപ്പായാല്‍ അരമനകളില്‍ പോയി കുമ്പിട്ടു നില്‍ക്കുന്നവരാണ് ഇവര്‍.നടനും സംവിധായകനുമായ ജോയ് മാത്യു പറഞ്ഞു. മൂന്നാർ കൈയ്യേറ്റം ഒഴിപ്പിക്കലിന് പിന്തുണ പ്രഖ്യാപിച്ചു യുവകലാസാഹിതി നടത്തിയ സാംസ്‌കാരിക കൂട്ടായ്മയില്‍ സംസാരിക്കുകയായിരുന്നു അദ്ദേഹം. മൂന്നാറിലെ കാര്യത്തില്‍ സര്‍ക്കാര്‍ കാട്ടുന്നതു ഭീരുത്വമാണ്. സംസ്‌കാര ശൂന്യരായ ഭരണകര്‍ത്താക്കളാണ് ഇന്നുള്ളത്. റവന്യൂ മന്ത്രിയുടെ ധീരമായ നിലപാടിനെ അഭിനന്ദിക്കുന്നു. ജനങ്ങള്‍ക്കു വേണ്ടി ജോലി ചെയ്യുന്ന ഉദ്യോഗസ്ഥരെ പിന്തുണയ്ക്കുകയാണ് ഇടതുപക്ഷം ചെയ്യേണ്ടത്. വന്‍കൈയ്യേറ്റക്കാര്‍ക്കെതിരെ ചെറുവിരല്‍ അനക്കാന്‍ പോലും സര്‍ക്കാരിനു കഴിയുന്നില്ലെന്നും അദ്ദേഹം പറഞ്ഞു.