ന്യൂദല്‍ഹി: കോവിഡ് 19 ഇന്ത്യയില്‍ 8,356 പേരെ ബാധിച്ചു, 273 പേര്‍ മരിച്ചു,  കഴിഞ്ഞ 24 മണിക്കൂറിനുള്ളില്‍ 909 പുതിയ കേസുകള്‍ റിപ്പോര്‍ട്ട് ചെയ്തു, 34 പേര്‍ മരിച്ചു എന്ന് കേന്ദ്ര ആരോഗ്യ മന്ത്രാലയം. വീഡിയോ കോണ്‍ഫറന്‍സില്‍ ശനിയാഴ്ച 13 മുഖ്യമന്ത്രിമാരുമായി നാല് മണിക്കൂര്‍ കൂടിക്കാഴ്ച നടത്തിയ പ്രധാനമന്ത്രി നരേന്ദ്ര മോദി രാജ്യവ്യാപകമായി ലോക്ക്ഡൗണ്‍ രണ്ടാഴ്ച നീട്ടുമെന്ന് സൂചിപ്പിച്ചതിന് തൊട്ടുപിന്നാലെയാണ് ഏറ്റവും പുതിയ കണക്കുകള്‍. കോവിഡ് 19 മഹാമാരി വ്യാപനം നിയന്ത്രിക്കുന്നതിനായി മാര്‍ച്ച് 25 ന് ആരംഭിച്ച ലോക്ക് ഡൌണിന്റെ വിപുലീകരണം പ്രഖ്യാപിക്കാന്‍ പ്രധാനമന്ത്രി മോദി വീണ്ടും ഒരു ടെലിവിഷന്‍ പ്രസംഗം നടത്തും. എന്നിരുന്നാലും, ഇത്തവണ സമ്പദ്‌വ്യവസ്ഥയെ രക്ഷിക്കുന്നതിലേക്ക് സര്‍ക്കാര്‍ ശ്രദ്ധ കേന്ദ്രീകരിക്കാന്‍ സാധ്യതയുണ്ട്, അതേസമയം വൈറസ് വ്യാപനം നിയന്ത്രിച്ച്   ജീവന്‍ രക്ഷിക്കാനും  ശ്രമിക്കുന്നു.