തിരുവനന്തപുരം: നിയമസഭാ തെരഞ്ഞെടുപ്പില്‍ മലമ്പുഴയില്‍ നിന്നുള്ള സിപിഎം സ്ഥാനാര്‍ഥി പട്ടികയില്‍ പ്രതിപക്ഷ നേതാവ് വി.എസ്.അച്യുതാനന്ദന്റെ പേരില്ല. പാലക്കാട് ജില്ലാ ഘടകം സമര്‍പ്പിച്ചിരിക്കുന്ന പട്ടികയില്‍ സിഐടിയു നേതാവ് എ.പ്രഭാകരന്‍ മാത്രമാണ് മലമ്പുഴയിലെ സ്ഥാനാര്‍ഥി പട്ടികയില്‍ ഇടം നേടിയത്. സിപിഎം സംസ്ഥാന സെക്രട്ടറിയറ്റില്‍ അവതരിപ്പിച്ച പട്ടികയിലാണ് വിഎസിന്റെ പേര് ഒഴിവാക്കിയിരിക്കുന്നത്. മലമ്പുഴയിലെ സ്ഥാനാര്‍ഥിയെ സംസ്ഥാന നേതൃത്വത്തിനു തീരുമാനിക്കാമെന്നും ജില്ലാ ഘടകം നല്‍കിയ റിപ്പോര്‍ട്ടില്‍ പറയുന്നുണ്ട്.  പൊളിറ്റ് ബ്യൂറോ അംഗം പിണറായി വിജയന്‍ ധര്‍മടത്തു നിന്നു മല്‍സരിക്കും.

കഴിഞ്ഞ തെരഞ്ഞെടുപ്പിലും മലമ്പുഴയിലെ സ്ഥാനാര്‍ഥി പട്ടികയില്‍ വി.എസിന്റെ പേര് ജില്ലാ ഘടകം ഉള്‍പ്പെടുത്തിയിരുന്നില്ല. പിന്നീട് പിബി ഇടപെട്ടാണ് വി.എസിനു സീറ്റു നല്‍കിയത്. മലമ്പുഴയില്‍ ജില്ലാ ഘടകം വി.എസിന്റെ പേര് ഉള്‍പ്പെടുത്തിയിട്ടില്ലെങ്കിലും മത്സരിച്ചാല്‍ അവിടെ തന്നെ എന്ന നിലപാടിലാണ് അദ്ദേഹം.  അതേസമയം വിജയസാധ്യതയുള്ള എംഎല്‍എമാര്‍ക്ക് വീണ്ടും മത്സരിക്കാമെന്ന് സെക്രട്ടറിയേറ്റില്‍ പൊതു അഭിപ്രായം ഉയര്‍ന്നു

സംസ്ഥാന സെക്രട്ടേറിയറ്റില്‍ അവതരിപ്പിച്ച സ്ഥാനാര്‍ഥി പട്ടികയില്‍ സിപിഎം സെക്രട്ടേറിയറ്റില്‍ നിന്ന് ആറു പേര്‍ നിയമസഭാ തിരഞ്ഞെടുപ്പില്‍ മല്‍സരിക്കും. പിണറായി വിജയന്‍ (ധര്‍മടം), തോമസ് ഐസക്ക് (ആലപ്പുഴ), ഇ.പി.ജയരാജന്‍ (മട്ടന്നൂര്‍), എ.കെ. ബാലന്‍ (തരൂര്‍), ടി.പി. രാമകൃഷ്ണന്‍ (പേരാമ്പ്ര), എം.എം. മണി (ഉടുമ്പന്‍ചോല) എന്നിവരാണ് മല്‍സരിക്കുന്നത്.