നവംബര്‍ 30  ന് ഞങ്ങള്‍ ഫോട്ടോഗ്രാഫേഴ്‌സ പതിവ് പോലെ സ്റ്റാച്യുവില്‍ നില്‍ക്കുമ്പോള്‍ പെട്ടെന്ന്  ഒരു കാറ്റ് ആഞ്ഞടിച്ചു. ആ കാറ്റില്‍ അവിടത്തെ സമരപന്തല്‍ പറക്കുകയുംപോസ്റ്റുകളൊക്കെ ഇളകി ആടുന്നതും കണ്ടിരുന്നു.  ശംഖുമുഖത്ത് രാഹുല്‍ ഗാന്ധിപങ്കെടുക്കുന്ന സമ്മേളനത്തിനുവേണ്ടി തയ്യാറാക്കിയ  കൂറ്റന്‍ വേദി  കാറ്റാടിച്ച്തകര്‍ന്നിരിക്കുന്നു എന്നറിഞ്ഞ് ഞങ്ങള്‍ പിന്നീട് അങ്ങോട്ട് പോയി.  കടലെടുത്ത വേദിയുടെ പടങ്ങളെടുത്ത്  അവിടുന്ന് തിരികെ ഞാന്‍  ബൈക്കില്‍ വരുമ്പോള്‍ വലിയതുറ വച്ച് കുറച്ചുപേര്‍ കടല്‍ തിരയില്‍ക്കിടന്ന് ഓടുന്നതും ചാടുന്നതും ശ്രദ്ധയില്‍ പെട്ടു. അത് എന്താണെന്നറിയാന്‍ അടുത്തേയ്ക്കുപോയി. തിരയെടുത്തുപോയ  വലയും മറ്റ് മത്സ്യബന്ധന ഉപകരണങ്ങളും തിരിച്ച്പിടിച്ചു കൊണ്ടിരിക്കുന്ന മത്സ്യതൊഴിലാളികളാണെന്ന് മനസ്സിലാക്കിയ ഉടന്‍ ഞാന്‍ കടലിലേക്കിറങ്ങി ക്യാമറ ഓണ്‍ ചെയ്ത് എല്ലാം സെറ്റുചെയ്യുന്നതിനു മുമ്പുതന്നെ അപ്രതീക്ഷമായി ഒരു വലിയ തിരവന്നെന്നെ വിഴുങ്ങി. ആ തിരയ്ക്കിടയിലൂടെ പലവട്ടം ക്യാമറ ക്ലിക് ചെയ്തു. ഒന്ന് ഓടി മാറാനോ വെള്ളംകയറുന്നതില്‍നിന്ന് ക്യാമറയെ സംരക്ഷിക്കാനോ എനിയ്ക്ക് കഴിഞ്ഞില്ല. വെള്ളം കയറി ക്യാമറ പണിമുടക്കിയതിനാല്‍ മറ്റു ചിത്രങ്ങള്‍ എടുക്കാനും കഴിഞ്ഞില്ല. തിരയില്‍പ്പെട്ട് ക്ലിക്ക് ചെയ്തപ്പോള്‍ ലഭിച്ച ചിത്രമാണ് പുരസ്‌കാരത്തിനു അയച്ചുകൊടുത്തതെന്നും ശിവജി പറഞ്ഞു. പുരസ്‌കാര പ്രാപ്തിക്കര്ഹമായ ചിത്രാനുഭാവം പങ്കുവയ്ക്കുകയായിരുന്നു അദ്ദേഹം.

തുടർ ദിനങ്ങളിൽ ഓഖി ചുഴലിക്കാറ്റിൽ കാണാതായ മത്സ്യത്തൊഴിലാളികളുടെ ചേതനയറ്റ ശരീരം കൊണ്ട് വരുന്നതൊക്കെ കവർ ചെയ്യേണ്ടിവന്നപ്പോൾ  ഒരു വൈകാരികതയ്ക്കും കീഴ്‌പ്പെടാത്ത ഞാൻ  പക്ഷെ, ഒരുമാസം കഴിഞ്ഞ് വിഴിഞ്ഞത്തും വെട്ടുകാടും നടന്ന നഷ്ടപരിഹാര വിതരണ ചടങ് കവർ ചെയ്തപ്പോൾ ശരിക്കും ഫീൽ  ചെയ്തു. അത് സ്വീകരിക്കാനായി പല തീരദേശ ഭാഗങ്ങളിൽ നിന്നും അവിടെ എത്തിയ ഭർത്താവ് നഷ്ടപ്പെട്ട ഭാര്യമാർ, അവരുടെ കുട്ടികൾ, മകൻ നഷ്ടപ്പെട്ട അമ്മമാർ തുടങ്ങി എല്ലാവരുടെയും കണ്ണുനീരും വിലാപവും എന്റെ ഹൃദയത്തെ വല്ലാതെ സ്പർശിച്ചിരുന്നു. ശിവജി ആ ദുരന്തമുഖം ഓർത്തെടുത്തു.